ਅਮ੍ਰਿਤਸਰ/ਮਲੇਰਕੋਟਲਾ, 26 ਜਨਵਰੀ (ਬਿਉਰੋ): ਸਿੱਖ ਕੌਮ ਦੇ ਮਹਾਨ ਸ਼ਹੀਦ ਬਾਬਾ ਦੀਪ ਸਿੰਘ ਦਾ ਜਨਮ ਦਿਹਾੜਾ ਅੱਜ 26 ਜਨਵਰੀ ਨੂੰ ਅਮ੍ਰਿਤਸਰ ਵਿਖੇ ਸੰਗਤਾਂ ਵੱਲੋਂ ਬਹੁਤ ਹੀ ਸ਼ਰਧਾ ਨਾਲ ਮਨਾਇਆ ਗਿਆ । ਵਿਸ਼ਵ ਭਰ ਵਿੱਚ ਆਪਣੇ ਧਰਮ ਅਤੇ ਗੁਰੂ ਸਾਹਿਬ ਪ੍ਰਤੀ ਸਮਰਪਨ ਦੀ ਬਾਬਾ ਦੀਪ ਸਿੰਘ ਵਰਗੀ ਸ਼ਹਾਦਤ ਅਤੇ ਤਿਆਗ ਦੀ ਮਿਸਾਲ ਨਹੀਂ ਮਿਲਦੀ । ਬਾਬਾ ਦੀਪ ਸਿੰਘ ਮਿਸਲ ਸ਼ਹੀਦਾਂ ਤਰਨਾ ਦਲ ਦੇ ਪਹਿਲੇ ਮੁੱਖੀ ਸਨ । ਬਾਬਾ ਦੀਪ ਸਿੰਘ ਨੇ ਦਸ਼ਮ ਪਾਤਸ਼ਾਹ ਸ੍ਰੀ ਗੁਰੂ ਗੋਬਿੰਦ ਸਿੰਘ ਦੇ ਨਜ਼ਦੀਕ ਰਹਿਕੇ ਹਥਿਆਰ ਚਲਾਉਣਾ, ਘੋੜ ਸਵਾਰੀ ਅਤੇ ਹੋਰ ਮਾਰਸ਼ਲ ਦੇ ਹੁਨਰ ਸਿੱਖੇ ।
ਇਸ ਸਬੰਧੀ ਅਦਾਰਾ ਅਬੂ ਜ਼ੈਦ ਨਿਊਜ਼ ਨਾਲ ਗੱਲਬਾਤ ਕਰਦਿਆਂ ਭਾਈ ਮਨਮੋਹਨ ਸਿੰਘ ਨੇ ਕਿਹਾ ਕਿ ਸਿੱਖ ਕੌਮ ਦੇ ਯੋਧੇ ਸਭ ਤੋਂ ਪਵਿੱਤਰ ਅਮਰ ਸ਼ਹੀਦ ਬਾਬਾ ਦੀਪ ਸਿੰਘ ਦਾ ਜਨਮ ਦਿਹਾੜਾ ਸੰਗਤਾਂ ਵੱਲੋਂ ਬਹੁਤ ਹੀ ਜੋਸ਼-ਖਰੋਸ਼ ਨਾਲ ਮਨਾਇਆ ਗਿਆ । ਬਾਬਾ ਜੀ ਦੇ ਜੀਵਨ ਤੋਂ ਸਾਨੂੰ ਆਪਣੇ ਧਰਮ ਅਤੇ ਧਾਰਮਿਕ ਸਥਾਨਾਂ ਦਾ ਸਨਮਾਣ ਕਰਨ ਦੀ ਪ੍ਰੇਰਣਾ ਮਿਲਦੀ ਹੈ । ਬਾਬਾ ਦੀਪ ਸਿੰਘ ਨੇ ਅਫਗਾਨ ਸੈਨਾ ਦੁਆਰਾ ਸਵਰਨ ਮੰਦਰ ਦੇ ਅਪਮਾਨ ਦਾ ਬਦਲਾ ਲੈਣ ਦੀ ਕਸਮ ਖਾਧੀ । 1757 ‘ਚ ਬਾਬਾ ਜੀ ਨੇ ਸਵਰਨ ਮੰਦਰ ਦੀ ਰੱਖਿਆ ਲਈ ਇੱਕ ਸੈਨਾ ਦੀ ਕਮਾਂਡ ਸੰਭਾਲੀ । ਅਮ੍ਰਿਤਸਰ ਦੀ ਲੜਾਈ ਵਿੱਚ ਸਿੱਖਾਂ ਅਤੇ ਅਫਗਾਨਾਂ ਦੇ ਦਰਮਿਆਨ ਘਮਸਾਨ ਯੁੱਧ ਹੋਇਆ । ਅਫਗਾਨੀ ਸੈਨਾ ਨਾਲ ਆਪਣੇ ਧਰਮ ਅਤੇ ਪਵਿੱਤਰ ਸਥਾਨ ਦੀ ਰੱਖਿਆ ਲਈ ਬਾਬਾ ਦੀਪ ਸਿੰਘ ਨੇ ਮਾਮੂਲੀ ਫੌਜੀ ਟੁਕੜੀ ਨਾਲ ਲੋਹਾ ਲਿਆ । ਇਸ ਯੁੱਧ ਨੇ ਵਿਸ਼ਵ ਦਾ ਇਤਿਹਾਸ ਬਦਲ ਦਿੱਤਾ ਅਤੇ ਬਾਬਾ ਜੀ ਅਮਰ ਸ਼ਹੀਦ ਹੋ ਗਏ । ਇਸ ਮੌਕੇ ਸਿੱਖ ਸੰਗਤ ਦੇ ਨੌਜਵਾਨਾਂ ਨੂੰ ਤਸਵੀਰਾਂ, ਵੀਡੀਓ ਅਤੇ ਸਿੱਖ ਸਕਾਲਰਾਂ ਦੁਆਰਾ ਦੇਸ਼ ਅਤੇ ਦੁਨੀਆ ਵਿੱਚ ਸਿੱਖ ਸ਼ਹੀਦਾਂ ਦੇ ਜੀਵਨ ਬਾਰੇ ਜਾਣਕਾਰੀ ਦੇ ਕੇ ਪ੍ਰੇਰਣਾ ਦਿੱਤੀ ਗਈ । ਅਮ੍ਰਿਤਸਰ ਵਿਖੇ ਇਸ ਸਮਾਗਮ ਦਾ ਆਯੋਜਨ ਨੂੰ ਸਫਲ ਬਣਾਉਣ ‘ਚ ਲਖਵਿੰਦਰ ਸਿੰਘ, ਮਨਮੋਹਨ ਸਿੰਘ, ਰਾਹੁਲ ਗਿੱਲ, ਲੱਕੀ ਸਿੰਘ, ਸੱਤਿਅਮ ਕੁਮਾਰ ਨੇ ਵਿਸ਼ੇਸ਼ ਭੂਮਿਕਾ ਨਿਭਾਈ ।