ਭਾਰਤ ਦੀ ਰਾਜਨੀਤੀ ਵਿੱਚੋਂ ਖਤਮ ਹੋ ਰਹੀ ਮੁਸਲਿਮ ਵਰਗ ਦੀ ਹਿੱਸੇਦਾਰੀ, ਚਿੰਤਾ ਦਾ ਵਿਸ਼ਾ

ਆਜ਼ਮ ਖਾਨ ਦਾ ਆਪਣੀ ਕੌਮ ਦੇ ਨਾਂ ਸੰਦੇਸ਼:

ਯੇ ਜ਼ਮਾਨਾ ਤੁਮਹੇਂ ਜਾਹਿਲ ਔਰ ਅਨਪੜ੍ਹ ਦੇਖਣਾ ਚਾਹੁੰਦਾ ਹੈ

ਹਿੰਦੁਸਤਾਨ ਦੇ ਮੁਸਤਕਬਿਲ ਦਾ ਹਿੱਸੇਦਾਰ ਨਹੀਂ ਬਨਾਣਾ ਚਾਹਤਾ

ਦਹਾਕਿਆਂ ਦੀ ਲੰਬੀ ਲੜਾਈ ਤੋਂ ਬਾਦ 1947 ਵਿੱਚ ਜਦੋਂ ਅੰਗਰੇਜ਼ਾਂ ਨੇ ਭਾਰਤ ਛੱਡਿਆ ਤਾਂ ਦੋ ਦੇਸ਼ ਭਾਰਤ ਅਤੇ ਪਾਕਿਸਤਾਨ ਬਣੇ । ਤਤਕਾਲੀ ਆਗੂਆਂ ਅਤੇ ਹਕੂਮਤ ਵੱਲੋਂ ਦੇਸ਼ ਦੇ ਸਿੱਖਾਂ ਅਤੇ ਮੁਸਲਮਾਨਾਂ ਨੂੰ ਇਹ ਭਰੋਸਾ ਦਿਲਵਾਇਆ ਗਿਆ ਭਾਰਤ ਧਰਮ ਨਿਰਪੱਖ ਦੇਸ਼ ਹੈ, ਇੱਥੇ ਹਰ ਧਰਮ, ਜਾਤੀ, ਵਰਗ, ਖਿੱਤੇ, ਨਸਲ ਦੇ ਲੋਕਾਂ ਨੂੰ ਅਜ਼ਾਦੀ ਦਾ ਨਿੱਘ ਮਿਲੇਗਾ । ਉਸ ਸਮੇਂ ਹਰ ਮੁਸਲਮਾਨ ਨੂੰ ਇਹ ਹੱਕ ਸੀ ਕਿ ਉਹ ਪਾਕਿਸਤਾਨ ਜਾ ਸਕਦਾ ਹੈ ਪਰੰਤੂ ਕੋਈ ਗੈਰ-ਮੁਸਲਿਮ ਨਹੀਂ ਸੀ ਜਾ ਸਕਦਾ । ਕਰੋੜਾਂ ਮੁਸਲਮਾਨਾਂ ਨੇ ਭਾਰਤ ਵਿੱਚ ਰਹਿਣਾ ਪਸੰਦ ਕੀਤਾ ਜਿੱਥੇ ਉਹਨਾਂ ਦੇ ਪੁਰਖੇ ਸਦੀਆਂ ਤੋਂ ਰਹਿੰਦੇ ਆ ਰਹੇ ਸਨ । ਉਹਨਾਂ ਦੇ ਘਰ, ਜ਼ਮੀਨਾਂ, ਕਾਰੋਬਾਰ, ਦੀਨੀ ਮਰਕਜ਼, ਬਜ਼ੁਰਗਾਂ ਦੀ ਕਬਰਾਂ, ਮਜ਼ਾਰ, ਰਾਸ਼ਟਰੀ ਧਰੋਹਰ ਮੌਜੂਦ ਸਨ । ਪਰੰਤੂ ਜਿਵੇਂ-ਜਿਵੇਂ ਸਮਾਂ ਬੀਤਦਾ ਗਿਆ ਤਾਂ ਸਿੱਖਾਂ ਅਤੇ ਮੁਸਲਮਾਨਾਂ ਨੂੰ ਬੇਗਾਨਗੀ ਦਾ ਅਹਿਸਾਸ ਕਰਵਾਇਆ ਜਾਣ ਲੱਗਾ । ਗੱਲ-ਗੱਲ ‘ਤੇ ਦੇਸ਼ ਭਗਤੀ ਦਾ ਸਬੂਤ ਮੰਗਿਆ ਜਾਣ ਲੱਗਾ ਜਦੋਂ ਕਿ ਦੇਸ਼ ਨੂੰ ਅਜ਼ਾਦ ਕਰਵਾਉਣ ਵਿੱਚ ਸਭ ਤੋਂ ਵੱਧ ਯੋਗਦਾਨ ਸਿੱਖਾਂ ਅਤੇ ਮੁਸਲਮਾਨਾਂ ਦਾ ਹੀ ਸੀ ।

2014, ਜਦੋਂ ਤੋਂ ਭਾਰਤ ਵਿੱਚ ਬੀਜੇਪੀ ਦੀ ਸਰਕਾਰ ਆਈ ਹੈ ਉਦੋਂ ਤੋਂ ਤਾਂ ਮੁਸਲਮਾਨਾਂ ਉੱਤੇ ਤਸ਼ੱਦਦ ਦੀ ਹੱਦ ਹੀ ਹੋ ਗਈ ਏ । ਬੀਜੇਪੀ ਨੇ ਭਾਰਤ ਦੀ ਰਾਜਨੀਤੀ ਨੂੰ ਮੁਸਲਿਮ ਮੁਕਤ ਕਰਨ ਦਾ ਤਹੱਈਆ ਕਰ ਲਿਆ ਹੈ । ਅੱਜ ਬੀਜੇਪੀ ਸਰਕਾਰ ਵਿੱਚ ਕੌਮਾਂਤਰੀ ਮੁਸਲਿਮ ਭਾਈਚਾਰੇ ਨੂੰ ਦਿਖਾਉਣ ਲਈ ਵੀ ਕੋਈ ਮੰਤਰੀ, ਰਾਸ਼ਟਰਪਤੀ, ਰਾਜਪਾਲ, ਕਿਸੇ ਸੂਬੇ ਦਾ ਮੁੱਖ ਮੰਤਰੀ, ਸੁਪਰੀਮ ਕੋਰਟ ਜਾਂ ਹਾਈਕੋਰਟ ਦਾ ਜੱਜ ਨਹੀਂ ਹੈ । ਜੇਕਰ ਕੋਈ ਉਮਰ ਖਾਲਿਦ, ਸ਼ਰਜ਼ੀਲ ਇਮਾਮ, ਮੁਹੰਮਦ ਸਲੀਮ ਖਾਨ, ਸ਼ਿਫਾ ਉਰ ਰਹਿਮਾਨ, ਮੀਰਾਨ ਹੈਦਰ, ਅਬਦੁਲ ਖਾਲਿਦ, ਗੁਲਫਿਸ਼ਾ ਫਾਤਿਮਾ ਆਪਣੇ ਜਾਂ ਆਪਣੀ ਕੌਮ ਦੇ ਹੱਕਾਂ-ਅਧਿਕਾਰਾਂ ਦੀ ਗੱਲ ਕਰਦੈ ਤਾਂ ਉਸ ਨੂੰ ਯੂਏਪੀਏ ਦੇ ਝੂਠੇ ਕੇਸ  ਬਣਾਕੇ ਜੇਲ੍ਹ ਵਿੱਚ ਸੁੱਟ ਦਿਤਾ ਜਾਂਦਾ ਹੈ । ਮੌਲਾਨਾ ਕਲੀਮ ਸਿੱਦੀਕੀ ਨੂੰ ਸਿਰਫ ਇਸ ਕਰਕੇ ਉਮਰ ਕੈਦ ਦੀ ਸਜ਼ਾ ਸੁਣਾ ਦਿੱਤੀ ਗਈ ਕਿ ਉਹਨਾਂ ਦੇ ਧਰਮ ਪ੍ਰਚਾਰ ਤੋਂ ਪ੍ਰਭਾਵਿਤ ਹੋ ਕੇ ਲੋਕ ਇਸਲਾਮ ਵੱਲ ਆ ਰਹੇ ਹਨ । ਮੁਸਲਿਮ ਸਕਾਲਰ ਜ਼ਾਕਿਰ ਨਾਇਕ ਨੂੰ ਸਿਰਫ ਇਸ ਲਈ ਦੇਸ਼ ਛੱਡਣਾ ਪਿਆ ਕਿ ਉਹ ਆਪਣੇ ਧਰਮ ਦਾ ਪ੍ਰਚਾਰ ਕਰ ਰਿਹਾ ਸੀ ।

ਇਸ ਲੇਖ ਰਾਹੀਂ ਮੈਂ ਇੱਕ ਅਜਿਹੇ ਹੀ ਕੌਮਪ੍ਰਸਤ ਦੇਸ਼ਭਗਤ ਯੋਧੇ “ਮੁਹੰਮਦ ਆਜ਼ਮ ਖਾਨ” ਬਾਰੇ ਪਾਠਕਾਂ ਨੂੰ ਜਾਣੂ ਕਰਾਉਣ ਜਾ ਰਿਹਾ ਹਾਂ । ਵੈਸੇ ਤਾਂ ਆਜ਼ਮ ਖਾਨ ਕਿਸੇ ਜਾਣ ਪਹਿਚਾਣ ਦੇ ਮੋਹਤਾਜ ਨਹੀਂ ਹਨ । ਦੇਸ਼ ਵਿਦੇਸ਼ ਵਿੱਚ ਲੋਕ ਉਹਨਾਂ ਨੂੰ ਇੱਕ ਮੁਸਲਿਮ ਕੌਮ ਦੇ ਸੱਚੇ ਆਗੂ ਵਜੋਂ ਜਾਣਦੇ ਹਨ ਜਿਹਨਾਂ ਨੇ ਆਪਣੀ ਸਾਰੀ ਜ਼ਿੰਦਗੀ ਇਮਾਨਦਾਰੀ ਨਾਲ ਸੇਵਾ ਕਰਦੇ ਹੋਏ ਆਪਣੀ ਕੌਮ ਨੂੰ ਸਮਰਪਿਤ ਕੀਤੀ ਹੋਈ ਹੈ, ਆਪਣੀ ਕੌਮ ਨੂੰ ਸਿੱਖਿਆ ਦੇ ਕੇ ਸਮੇਂ ਦਾ ਹਾਣੀ ਬਣਾਉਣ ਲਈ ਅਣਥੱਕ ਕੋਸ਼ਿਸ਼ਾਂ ਕਰਦੇ ਰਹੇ । ਜਿਸ ਦੇ ਨਤੀਜੇ ਵਜੋਂ ਉਹ ਆਪਣਾ ਸਭ ਕੁਝ ਗੁਆਕੇ ਅੱਜ ਜੇਲ੍ਹ ਦੀਆਂ ਸਲਾਖਾਂ ਦੇ ਪਿੱਛੇ ਹਨ ਅਤੇ ਮੁਸਲਿਮ ਕੌਮ ਅਤੇ ਉਹਨਾਂ ਦੀਆਂ ਹਮਾਇਤੀ ਸਿਆਸੀ ਜਮਾਤਾਂ ਅੱਜ ਖਾਮੋਸ਼ ਹਨ । ਅੰਗਰੇਜ਼ਾਂ ਦੀ ਗੁਲਾਮੀ ਕਬੂਲ ਕਰਨ ਵਾਲੇ ਲੋਕ ਅੱਜ ਦੇਸ਼ ਦੇ ਹਰ ਮੁਸਲਮਾਨ ਤੋਂ ਦੇਸ਼ ਭਗਤੀ ਦਾ ਸਬੂਤ ਮੰਗ ਰਹੇ ਹਨ । ਜੇਕਰ ਅੱਜ ਆਜ਼ਮ ਖਾਨ ਉੱਤੇ ਹੋ ਰਹੇ ਤਸ਼ੱਦਦ ਉੱਤੇ ਮੁਸਲਿਮ ਕੌਮ ਚੁੱਪ ਰਹੀ ਤਾਂ ਭਵਿੱਖ ਵਿੱਚ ਹੋਰ ਵੀ ਭਿਆਨਕ ਨਤੀਜੇ ਭੁਗਤਨ ਲਈ ਤਿਆਰ ਰਹਿਣ ।

ਅਬ ਵੀ ਨਾ ਸਮਝੇ, ਤੋਂ ਮਿਟ ਜਾਓਗੇ ਐ ਮੁਸਲਮਾਨੋਂ

ਤੁਮਹਾਰੀ ਦਾਸਤਾਂ ਤੱਕ ਵੀ ਨਾ ਰਹੇਗੀ ਦਾਸਤਾਨੋਂ ਮੇਂ

ਮੁਹੰਮਦ ਆਜ਼ਮ ਖਾਨ ਦਾ ਜਨਮ 14 ਅਗਸਤ 1948 ਨੂੰ ਉੱਤਰ ਪ੍ਰਦੇਸ਼ ਰਾਮਪੁਰ ਵਿੱਚ ਮੁਮਤਾਜ਼ ਖਾਨ ਦੇ ਘਰ ਹੋਇਆ ਸੀ । ਉਨ੍ਹਾਂ ਨੇ ਅਲੀਗੜ੍ਹ ਮੁਸਲਿਮ ਯੂਨੀਵਰਸਿਟੀ ਵਿੱਚ ਪੜ੍ਹਾਈ ਕੀਤੀ ਅਤੇ 1974 ਵਿੱਚ ਕਾਨੂੰਨ ਦੀ ਬੈਚਲਰ ਡਿਗਰੀ ਪ੍ਰਾਪਤ ਕੀਤੀ । ਖਾਨ ਸਾਹਿਬ ਨੇ 1981 ਵਿੱਚ ਤਾਜ਼ੀਨ ਫਾਤਮਾ ਨਾਲ ਵਿਆਹ ਕੀਤਾ ਅਤੇ ਉਨ੍ਹਾਂ ਦੇ ਦੋ ਪੁੱਤਰ ਅਬਦੁੱਲਾ ਆਜ਼ਮ ਖਾਨ ਅਤੇ ਅਦੀਬ ਆਜ਼ਮ ਖਾਨ ਹਨ । ਰਾਜਨੀਤੀ ਵਿੱਚ ਆਉਣ ਤੋਂ ਪਹਿਲਾਂ, ਉਹ ਇੱਕ ਵਕੀਲ ਵਜੋਂ ਕੰਮ ਕਰਦੇ ਸਨ । ਉਨ੍ਹਾਂ ਦਾ ਪੁੱਤਰ ਅਬਦੁੱਲਾ ਆਜ਼ਮ ਖਾਨ 2017 ਤੋਂ 2019 ਤੱਕ ਸੁਆਰ ਵਿਧਾਨ ਸਭਾ ਹਲਕੇ ਤੋਂ ਵਿਧਾਇਕ ਸੀ ।

ਮੁਹੰਮਦ ਆਜ਼ਮ ਖਾਨ ਇੱਕ ਆਮ ਪਰਿਵਾਰ ਤੋਂ ਸੀ। ਉਨ੍ਹਾਂ ਨੇ 1980 ਦੇ ਦਹਾਕੇ ਵਿੱਚ ਰਾਮਪੁਰ ਦੇ ਨਵਾਬ ਦਾ ਮੁਕਾਬਲਾ ਕਰਨ ਲਈ ਬੀੜੀ ਅਤੇ ਕੱਪੜਾ ਮਜ਼ਦੂਰਾਂ ਅਤੇ ਰਿਕਸ਼ਾ ਚਾਲਕਾਂ ਦੀਆਂ ਯੂਨੀਅਨਾਂ ਬਣਾਈਆਂ। ਆਜ਼ਮ ਖਾਨ ਨੇ ਰਾਮਪੁਰ ਵਿੱਚ ਨਵਾਬ ਪਰਿਵਾਰ ਦੇ ਰਾਜਨੀਤਿਕ ਦਬਦਬੇ ਨੂੰ ਖਤਮ ਕਰ ਦਿੱਤਾ । ਆਜ਼ਮ ਖਾਨ 1980, 1985, 1989, 1991, 1993, 2002, 2007, 2012, 2017, 2022  ਵਿੱਚ ਦਸ ਰਾਮਪੁਰ ਤੋਂ ਵਿਧਾਇਕ ਬਣੇ ਅਤੇ 1996  ਅਤੇ 2019 ਵਿੱਚ ਰਾਜ ਸਭਾ ਅਤੇ ਲੋਕ ਸਭਾ ਦੇ ਮੈਂਬਰ ਰਹੇ । ਉਹ ਯੂਪੀ ਸਰਕਾਰਾਂ ਵਿੱਚ ਕੈਬਨਿਟ ਮੰਤਰੀ ਅਤੇ ਵਿਰੋਧੀ ਧਿਰ ਦੇ ਆਗੂ ਵੀ ਰਹੇ । ਇਸ ਦੌਰਾਨ ਉਹਨਾਂ ਆਪਣੇ ਹਲਕੇ ਅੰਦਰ ਸਿਹਤ, ਸਿੱਖਿਆ ਅਤੇ ਬੁਨਿਆਦੀ ਸਹੂਲਤਾਂ ਲਈ ਸ਼ਾਨਦਾਰ ਕੰਮ ਕੀਤੇ ।

ਮੈਂ ਮਰ ਜਾਊਂ, ਤੋ ਮੇਰੀ ਏਕ ਅਲਗ ਪਹਿਚਾਨ ਲਿਖ ਦੇਣਾ

ਲਹੂ ਸੇ ਮੇਰੀ ਪੇਸ਼ਾਨੀ ਪੇ, ਹਿਦੁਸਤਾਂ ਲਿਖ ਦੇਣਾ

ਆਜ਼ਮ ਖਾਨ ‘ਤੇ ਕਥਿਤ ਜ਼ਮੀਨੀ ਕਬਜ਼ੇ ਅਤੇ ਅਪਰਾਧਿਕ ਧਮਕੀ ਨਾਲ ਸਬੰਧਤ ਲਗਭਗ 80 ਕਾਨੂੰਨੀ ਅਤੇ ਅਪਰਾਧਿਕ ਮਾਮਲੇ ਦਰਜ ਕੀਤੇ ਗਏ, ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ 2017 ਤੋਂ ਬਾਅਦ ਮੁਹੰਮਦ ਅਲੀ ਜੌਹਰ ਯੂਨੀਵਰਸਿਟੀ ਲਈ ਜ਼ਮੀਨ-ਹਥਿਆਉਣ ਦੇ ਸਬੰਧ ਵਿੱਚ ਦਰਜ ਕੀਤੇ ਗਏ ਸਨ । ਰਾਮਪੁਰ ਪੁਲਿਸ ਜ਼ਮੀਨ ਪ੍ਰਾਪਤੀ ਦੇ ਇੱਕ ਮਾਮਲੇ ਦੀ ਜਾਂਚ ਕਰ ਰਹੀ ਹੈ । ਖਾਨ ਸਾਹਿਬ ਦੁਆਰਾ ਸਥਾਪਿਤ ਐਨਜੀਓ ‘ਜੌਹਰ ਟਰੱਸਟ’ ਵਿਰੁੱਧ ਜ਼ਮੀਨ ਹਥਿਆਉਣ ਦੇ ਕਈ ਮਾਮਲੇ ਦਰਜ ਹਨ । ਯੂਪੀ ਪੁਲਸ ਦੀ ਬੇਸ਼ਰਮੀ ਦੀ ਹੱਦ ਉਸ ਸਮੇਂ ਹੋ ਗਈ ਜਦੋਂ ਆਜ਼ਮ ਖਾਨ ਜੋ 10 ਵਾਰ ਵਿਧਾਇਕ ਅਤੇ ਦੋ ਵਾਰ ਸੰਸਦ ਮੈਂਬਰ ਚੁਣੇ ਗਏ ਉੱਤੇ ਕਿਤਾਬਾਂ ਚੋਰੀ, ਸ਼ਰਾਬ ਦੀ ਦੁਕਾਨ ਤੋਂ ਪੈਸੇ ਲੁੱਟਣ ਆਦਿ ਤੱਕ ਦੇ ਮਾਮਲੇ ਦਰਜ ਕੀਤੇ ਗਏ । ਅਕਤੂਬਰ 2024 ਵਿੱਚ, ਭਾਰਤ ਦੀ ਸੁਪਰੀਮ ਕੋਰਟ ਨੇ ਆਜ਼ਮ ਖਾਨ ਨੂੰ ਫਟਕਾਰ ਲਗਾਈ ਅਤੇ ਰਾਮਪੁਰ ਵਿੱਚ ਉਸਦੇ ਮੌਲਾਨਾ ਮੁਹੰਮਦ ਅਲੀ ਜੌਹਰ ਟਰੱਸਟ ਨੂੰ ਸਰਕਾਰੀ ਜ਼ਮੀਨ ਦੀ ਲੀਜ਼ ਨੂੰ “ਅਹੁਦੇ ਦੀ ਦੁਰਵਰਤੋਂ” ਵਜੋਂ ਲੇਬਲ ਕੀਤਾ ।

ਇੱਕ ਸਰਕਾਰੀ ਵਕੀਲ ਨੇ ਦੱਸਿਆ ਕਿ 17 ਨਵੰਬਰ 2025 ਨੂੰ, ਆਜ਼ਮ ਖਾਨ ਅਤੇ ਉਸਦੇ ਪੁੱਤਰ ਅਬਦੁੱਲਾ ਆਜ਼ਮ ਨੂੰ ਇੱਕ ਵਿਸ਼ੇਸ਼ ਸੰਸਦ ਮੈਂਬਰ/ਵਿਧਾਇਕ ਅਦਾਲਤ ਨੇ 2019 ਦੇ ਇੱਕ ਮਾਮਲੇ ਵਿੱਚ ਦੋਸ਼ੀ ਠਹਿਰਾਇਆ ਅਤੇ ਸੱਤ ਸਾਲ ਤੱਕ ਦੀ ਕੈਦ ਦੀ ਸਜ਼ਾ ਸੁਣਾਈ, ਜਿਸ ਵਿੱਚ ਵੱਖ-ਵੱਖ ਜਨਮ ਤਰੀਕਾਂ ਦੀ ਵਰਤੋਂ ਕਰਕੇ ਦੋ ਪੈਨ ਕਾਰਡ ਪ੍ਰਾਪਤ ਕੀਤੇ ਗਏ ਸਨ । ਸਰਕਾਰਾਂ ਦੇ ਦਬਾਅ ਹੇਠ ਕੰਮ ਕਰ ਰਹੀਆਂ ਅਦਾਲਤਾਂ ਦੇ ਇਸ ਫੈਸਲੇ ਨੇ ਦੇਸ਼ ਦੇ 40 ਕਰੋੜ ਮੁਸਲਮਾਨਾਂ ਦੇ ਦਿਲ ‘ਤੇ ਗਹਰੀ ਸੱਟ ਮਾਰੀ ਹੈ । ਜਿਸ ਦੇਸ਼ ਦੀ ਸੰਸਦ ਵਿੱਚ ਅੱਧੇ ਸਾਂਸਦ ਅਪਰਾਧਿਕ ਮਾਮਲਿਆਂ ਵਿੱਚ ਨਾਮਜ਼ਦ ਹੋਣ, ਹਰ ਸੂਬੇ ਦੀ ਵਿਧਾਨ ਸਭਾ ਵਿੱਚ ਦਰਜਨਾਂ ਵਿਧਾਇਕ ਸੰਗੀਨ ਅਪਰਾਧਾਂ ਦੇ ਮਾਮਲਿਆਂ ਵਿੱਚ ਨਾਮਜ਼ਦ ਹੋਣ ਅਤੇ ਉਸੇ ਸੂਬੇ ਦੇ ਮੁੱਖ ਮੰਤਰੀ ਨੇ ਆਪਣੇ ‘ਤੇ ਚਲਦੇ ਦਰਜਨਾਂ ਮੁਕੱਦਮੇ ਖੁਦ ਹੀ ਵਾਪਸ ਲੈ ਲਏ ਹੋਣ ਉੱਥੇ 7 ਸਾਲ ਦੀ ਸਜ਼ਾ ਸਿਰਫ ਆਜ਼ਮ ਖਾਨ ਨੂੰ ਦੋ ਪੈਨ ਕਾਰਡ ਮਾਮਲੇ ਵਿੱਚ ਹੋਵੇ ਇਹ ਦੇਸ਼ ਦੇ ਸਿਆਸੀ ਮਾਹਿਰਾਂ, ਬੁੱਧੀਜੀਵੀਆਂ ਅਤੇ ਸੁਹਿਰਦ ਲੋਕਾਂ ਲਈ ਬਹੁਤ ਹੀ ਚਿੰਤਾ ਦਾ ਵਿਸ਼ਾ ਹੈ । 77 ਸਾਲ ਦੇ ਆਜ਼ਮ ਖਾਨ ਪਹਿਲੇ ਕੇਸਾਂ ਵਿੱਚੋਂ ਜਮਾਨਤ ਲੈ ਕੇ ਸਿਰਫ 55 ਦਿਨ ਹੀ ਘਰ ਰਹੇ ਹਨ ਕਿ ਇੱਕ ਹੋਰ ਕੇਸ ਵਿੱਚ 7 ਸਾਲ ਦੀ ਸਜ਼ਾ ਸੁਣਾ ਦਿੱਤੀ ।

ਪੇਸ਼ਕਸ਼:

ਮੁਹੰਮਦ ਜਮੀਲ (ਐਮ.ਏ. ਜਰਨਾਲਿਜ਼ਮ)

ਗਰੀਨ ਟਾਊਨ, ਕਿਲਾ ਰਹਿਮਤਗੜ੍ਹ

ਮਲੇਰਕੋਟਲਾ – 148023

ਸੰਪਰਕ: 9417969547