ਸਿਵਲ ਹਸਪਤਾਲ ਧਰਨੇ ਦਾ 13ਵਾਂ ਦਿਨ, ਫਰੰਟ ਨੇ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ ‘ਚ ਜਾਗਰੂਕਤਾ ਮੀਟਿੰਗਾਂ ਦਾ ਕੀਤਾ ਆਗਾਜ਼
ਮਲੇਰਕੋਟਲਾ, 21 ਅਕਤੂਬਰ (ਬਿਉਰੋ): ਜਿਲ੍ਹਾ ਹਸਪਤਾਲ ਮਲੇਰਕੋਟਲਾ ਵਿਚ ਡਾਕਟਰਾਂ ਦੀਆਂ ਖਾਲੀ ਪੋਸਟਾਂ ਭਰਨ ਲਈ ਡਾ. ਅਬਦੁਲ ਕਲਾਮ ਵੈਲਫੇਅਰ ਫਰੰਟ ਆਫ ਪੰਜਾਬ ਵੱਲੋਂ 9 ਅਕਤੂਬਰ ਤੋਂ ਸੁਰੂ ਕੀਤਾ ਧਰਨਾ 13ਵੇਂ ਦਿਨ ਵੀ ਜਾਰੀ ਹੈ । ਅੱਜ ਇਸ ਧਰਨੇ ਵਿੱਚ ਸ੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ (ਫਤਿਹ) ਦੇ ਪ੍ਰਧਾਨ ਜਥੇਦਾਰ ਜਸਕਰਨ ਸਿੰਘ ਕਾਹਨ ਸਿੰਘ ਵਾਲਾ ਆਪਣੇ ਵਿਸ਼ਾਲ ਕਾਫਲੇ ਸਮੇਤ ਸ਼ਾਮਿਲ ਹੋਏ । ਇਸ ਮੌਕੇ ਉਹਨਾਂ ਆਪਣੇ ਸੰਬੋਧਨ ਵਿੱਚ ਪੰਜਾਬ ਸਰਕਾਰ ਅਤੇ ਸਿਹਤ ਵਿਭਾਗ ਨੂੰ ਚੇਤਾਵਨੀ ਦਿਤੀ ਕਿ ਸਰਕਾਰ ਨੇ ਜੇਕਰ ਧਰਨਾਕਾਰੀਆਂ ਲੋਕ ਹਿੱਤ ਵਾਲੀਆਂ ਸਾਰੀਆਂ ਮੰਗਾਂ ਨਾ ਮੰਨੀਆਂ ਤਾਂ ਉਨ੍ਹਾਂ ਦੀ ਪਾਰਟੀ ਸਹਿਰ ਵਾਸੀਆਂ ਤੇ ਧਰਨਾਕਾਰੀ ਆਗੂਆਂ ਦੇ ਸਹਿਯੋਗ ਨਾਲ 15 ਨਵੰਬਰ ਨੂੰ ਵਿਸ਼ਾਲ ਰੋਸ ਧਰਨਾ ਦੇਵੇਗੀ ਅਤੇ ਕੱਲ੍ਹ ਤੋਂ ਧਰਨਾਕਾਰੀ ਹਰ ਰੋਜ਼ ਸਾਮ ਨੂੰ ਸਿਹਤ ਮੰਤਰੀ ਅਤੇ ਐਸ.ਐਮ.ਓ. ਦਾ ਪੁਤਲਾ ਫੂਕਣਗੇ । ਉਨ੍ਹਾਂ ਮਲੇਰਕੋਟਲਾ ਦੇ ਵਿਧਾਇਕ ਨੂੰ ਲਾਹਨਤ ਪਾਉਂਦਿਆਂ ਕਿਹਾ ਕਿ ਵਿਧਾਇਕ ਨੂੰ ਹਸਪਤਾਲ ਵਿਚ ਡਾਕਟਰਾਂ ਦੀ ਮੰਗ ਨੂੰ ਲੈ ਕੇ ਚੱਲ ਰਹੇ ਧਰਨੇ ਵਿਚ ਖੁਦ ਆ ਕੇ ਬੈਠਣਾ ਚਾਹੀਦਾ ਸੀ । ਜਥੇਦਾਰ ਕਾਹਨ ਸਿੰਘ ਵਾਲਾ ਨੇ ਆਮ ਆਦਮੀ ਪਾਰਟੀ ਦੇ ਮੁੱਖੀ ਕੇਜਰੀਵਾਲ ਅਤੇ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਪੰਜਾਬ ਦੇ ਲੋਕਾਂ ਦਾ ਨਹੀਂ ਸਗੋਂ ਦਿੱਲੀ ਦਾ ਯਾਰ ਦਸਦਿਆਂ ਕਿਹਾ ਕਿ ‘ਆਪ’ ਸਰਕਾਰ ਵਿਚ ਇਕ ਵੀ ਮੁਸਲਮਾਨ ਨੂੰ ਮੰਤਰੀ ਨਾ ਬਨਾਉਣਾ ਇਸ ਤੱਥ ਦਾ ਪ੍ਰਮਾਣ ਹੈ ਕਿ ਇਹ ਪਾਰਟੀ ਘੱਟ ਗਿਣਤੀ ਭਾਈਚਾਰਿਆਂ ਖਾਸ ਕਰਕੇ ਮੁਸਲਮਾਨਾਂ ਨੂੰ ਘੋਰ ਨਫਰਤ ਕਰਦੀ ਹੈ । ਇਸ ਤੋਂ ਪਹਿਲਾਂ ਧਰਨੇ ਨੂੰ ਸੰਬੋਧਨ ਕਰਨ ਵਾਲਿਆਂ ਵਿਚ ਸ੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ (ਫਤਿਹ) ਦੇ ਮੀਤ ਪ੍ਰਧਾਨ ਹਰਵੀਰ ਸਿੰਘ ਸੌਂਟੀ ਅਤੇ ਜਸਵੰਤ ਸਿੰਘ ਚੀਮਾ, ਬਲਜਿੰਦਰ ਸਿੰਘ ਲਸੋਈ ਜਨਰਲ ਸੱਕਤਰ, ਮੁਹੰਮਦ ਰਮਜ਼ਾਨ ਸਰਪ੍ਰਸਤ ਮਲੇਰਕੋਟਲਾ, ਮੁਹੰਮਦ ਨਦੀਮ ਪ੍ਰਧਾਨ ਯੂਥ ਵਿੰਗ ਮਲੇਰਕੋਟਲਾ, ਮੱਖਣ ਸਿੰਘ ਸਹੌਲੀ ਜਿਲ੍ਹਾ ਪ੍ਰਧਾਨ ਪਟਿਆਲਾ, ਦਲਜਿੰਦਰ ਕੌਰ ਇੰਚਾਰਜ ਮਾਲਵਾ ਜੋਨ, ਜੈ ਸਿੰਘ ਯੂਥ ਵਿੰਗ ਪ੍ਰਧਾਨ ਮਾਨਸਾ, ਮੁਹੰਮਦ ਮਜੀਦ, ਮੈਡਮ ਸਾਜ਼ੀਆ ਪਰਵੀਨ ਜਿਲ੍ਹਾ ਪ੍ਰਧਾਨ ਮਹਿਲਾ ਵਿੰਗ ਫਤਿਹ ਅਕਾਲੀ ਦਲ ਮਲੇਰਕੋਟਲਾ, ਬੀਬੀ ਬਲਜਿੰਦਰ ਕੌਰ ਪਟਿਆਲਾ, ਮੁਹੰਮਦ ਜਾਹਿਦ ਪੀਰ ਸੂਬਾ ਮੀਤ ਪ੍ਰਧਾਨ ਘੱਟ ਗਿਣਤੀ ਮੋਰਚਾ ਭਾਜਪਾ, ਫਰੰਟ ਦੇ ਪ੍ਰਧਾਨ ਸਮਸ਼ਾਦ ਝੋਕ, ਜਨਰਲ ਸਕੱਤਰ ਮੁਨਸ਼ੀ ਮੁਹੰਮਦ ਫਾਰੂਕ, ਪ੍ਰੈਸ ਸਕੱਤਰ ਸਾਹਿਦ ਜ਼ੁਬੈਰੀ, ਸੀ.ਪੀ.ਐਮ. ਆਗੂ ਕਾ. ਅਬਦੁਲ ਸਤਾਰ, ਬਸਪਾ ਪ੍ਰਧਾਨ ਸਮਸ਼ਾਦ ਅਨਸਾਰੀ, ਜਿਲ੍ਹਾ ਕਾਂਗਰਸ ਦੇ ਮੀਡੀਆ ਇੰਚਾਰਜ ਮਹਿਮੂਦ ਰਾਣਾ ਅਤੇ ਟੈਂਪੂ ਯੂਨੀਅਨ ਦੇ ਸਾਬਕਾ ਪ੍ਰਧਾਨ ਯਾਸੀਨ ਘੁੱਗੀ, ਮੁਹੰਮਦ ਨਦੀਮ ਨੋਨੀ,. ਗੁਰਜੀਤ ਸਿੰਘ ਚੱਲ ਬਸਪਾ ਆਗੂ, ਮੁਹੰਮਦ ਯਾਸੀਨ ਸਾਬਕਾ ਪ੍ਰਧਾਨ ਅਤੇ ਮੁਹੰਮਦ ਸਹਿਬਾਜ਼ ਪ੍ਰਧਾਨ ਯੂਥ ਕਾਂਗਰਸ ਮਲੇਰਕੋਟਲਾ ਆਦਿ ਆਗੂ ਸ਼ਾਮਿਲ ਸਨ। ਇਸ ਮੌਕੇ ਜਾਣਕਾਰੀ ਦਿੰਦਿਆਂ ਫਰੰਟ ਦੇ ਪਰੈਸ ਸਕੱਤਰ ਸ਼ਾਹਿਦ ਜ਼ੁਬੈਰੀ ਨੇ ਦੱਸਿਆ ਕਿ ਸਿਵਲ ਹਸਪਤਾਲ ਧਰਨੇ ਦੇ 13ਵੇਂ ਦਿਨ ਫਰੰਟ ਨੇ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ ‘ਚ ਜਾਗਰੂਕਤਾ ਮੀਟਿੰਗਾਂ ਦਾ ਕੀਤਾ ਆਗਾਜ਼ ਕੀਤਾ ਹੈ ਜਿਸ ਤਹਿਤ ਅੱਜ ਸ਼ਾਮ ਕਿਲਾ ਰਹਿਮਤਗੜ੍ਹ ਜਾਮਾ ਮਸਜਿਦ ਦੇ ਸਾਹਮਣੇ ਜਾਗਰੂਕਤਾ ਮੀਟਿੰਗ ਦਾ ਆਯੋਜਨ ਕੀਤਾ ਗਿਆ ਜਿਸ ਵਿੱਚ ਵੱਡੀ ਗਿਣਤੀ ‘ਚ ਲੋਕਾਂ ਨੇ ਸ਼ਿਰਕਤ ਕੀਤੀ । ਇਸ ਮੌਕੇ ਫਰੰਟ ਦੇ ਆਗੂਆਂ ਨੇ ਧਰਨੇ ਸਬੰਧੀ ਜਾਣਕਾਰੀ ਦਿੱਤੀ ਅਤੇ ਲੋਕਾਂ ਨੂੰ ਦੱਸਿਆ ਕਿ ਸਾਡੇ ਅਧਿਕਾਰ ਕੀ ਹਨ ਅਤੇ ਅਸੀਂ ਆਪਣੇ ਹੱਕ ਕਿਵੇਂ ਲੈਣੇ ਹਨ । ਉਹਨਾਂ ਦੱਸਿਆ ਕਿ ਸੋਮਵਾਰ ਨੂੰ ਬਹੁਜਨ ਸਮਾਜ ਪਾਰਟੀ ਦੇ ਸੂਬਾ ਪ੍ਰਧਾਨ ਜਸਵੀਰ ਸਿੰਘ ਗੜ੍ਹੀ ਅਤੇ ਸੂਬਾ ਜਨਰਲ ਸੱਕਤਰ ਚਮਕੌਰ ਸਿੰਘ ਵੀਰ ਵਿਸ਼ਾਲ ਕਾਫਲੇ ਸਮੇਤ ਧਰਨੇ ਵਿਚ ਸ਼ਾਮਿਲ ਹੋਣਗੇ।